بۆ جاری دووەم لە میانی سەردانیدا بۆ پارێزگای هەڵەبجە، سەرۆکی دەستەی وەبەرهێنان سەردانی پرۆژەی گۆران سیتی کردو هەنگاوەکانی کۆتایی و جێبەجێکردنی پرۆژەکەی بەرز نرخاند و دەستخۆشی لە کۆمپانیای بەرێز و خاوەنی کۆمپانیاکە کرد لە پای بەباشی بەڕیوەچوونی کارەکانی پرۆژەکە.

د. محەمەد شوکری، سەرۆکی دەستەی وەبەرهێنان، لە میانی ڕێوڕەسمی کردنەوەی بەڕێوەبەرایەتی وەبەرهێنانی پارێزگای هەڵەبجە، سەردانی پرۆژەی نیشتەجێبوونی گۆران سیتی کرد، کە کۆمپانیای جێبەجێکارەکەی گروپی کۆمپانیاکانی بەڕێزەو یەکێکە لە گەورەترین پرۆژە وەبەرهێنانەکانی بواری نیشتەجێبوون لە پارێزگاکەدا و 1350 یەکەی نیشتە جێبوون لەخۆ دەگرێت و لە ئێستادا قۆناغی سێیەمی پرۆژەکە بە شەقام و شۆستەو سەرجەم خزمەتگوزارییەکانی لە تەواو بووندایە.

سەرۆکی دەستەی وەبەرهێنان، دەستخۆشی لە گروپی کۆمپانیاکانی بەڕێز کرد لەپای هەوڵە بەردەوامەکانیان بۆ تەواوکردنی پرۆژەکەو بە بایەخەوە لە هەنگاوەکانی تەواوکاری پرۆژەکەو خزمەتگوزارییەکانی ڕوانی و ڕایگەیاند، بۆ جاری دووەمە سەردانی گۆران سیتی دەکەم ئەم پرۆژەیە جێی بایەخمانە و لە داهاتووتریش دا لەگەڵ هەنگاوەکانی کۆتایی سەردانیان دەکەمەوە و دەستخۆشیان لێدەکەم.

هاوکات سەرۆکی دەستەی وەبەرهێنان، خۆشحاڵ بوو کە پرۆژەکە لە قۆناغەکانی کۆتایدایەو کارکردن تیایدا بەردەوامە، وێڕای دەستخۆشی و ئاڕاستەکردنی سوپاس و پێزانین لە وەبەرهێنەری پرۆژەکە داواشی لە بەڕێوەبەرایەتییە گشتییەکانی پەیوەست بە وەبەرهێنان کرد چاودێری زیاتری پڕۆژەکە بکەن.

هەر لە میانی سەردانی پرۆژەی نیشتەجێبوونی گۆران سیتی یاسین مەحمود ڕەشید، خاوەنی گروپی کۆمپانیاکانی بەڕیز، دکتۆر محەمەد شوکری، سەرۆکی دەستەی وەبەرهێنانی بردە شوێنی دروستکردنی مۆنۆمێنتی گەنجان، کە لە ناو پڕۆژەکەدا لە سەر ڕووبەری 3200 مەتر چوارگۆشە بە بەرزی 35 مەتر و تێجووی 2 ملیار دینار لەسەر ئەرکی کۆمپانیای بەڕێز دروست دەکرێت، کە مۆنۆمێنتەکە گوزارشتە لە خۆراگری و ئازایی هەڵەبجەییەکان بەرامبەر ئازار و مەینەتییەکانی ڕابردوویان، هاوگۆڕەپانی مۆنۆمێنتەکە لە خۆگری ڕووبەرێکی فراوانی سەوزایی و چەندین باڵاخانە و تەلاری سەردەم دەبێت کە هۆڵی وەرزشی و کافی و ڕێستۆرانت لە خۆ دەگرێت و دەبێتە سەکۆیەک بۆ کۆبوونەوەی گەنجان تیایدا.

سەرۆکی دەستەی وەبەرهێنان، ستایشی ئەم هەوڵەی کۆمپانیایی بەڕێزی کردو ڕایگەیاند، مایەیی خۆشحاڵییە کە لە ناو پرۆژەیەکی وەبەرهێناندا مۆنۆمێنتێکی لەم شێوەیە هەیەو گوزارشت دەکات لە خۆڕاگری و بەڕوودا وەستانەوەی هەموو ئەو نەهامەتیانەی بە سەر خەڵکی ناوچەکەدا هاتووە.