• 3/15/2020 1:15:43 PM

مەلا یاسین داوای ڕاگەیاندنی كەمپینێكی گەورەی دارایی بۆ ڕووبەڕووبوونەوەی ڤایرۆسی كۆرۆنا دەكات

سەرۆكی یەكێتی وەبەرهێنەرانی كوردستان لە ڕاگەیەنراوێكدا داوا لە لە وەبەرھێنەران و سەرمایەداران دەكات كەمپینێكی گەورەی دارایی بۆ ڕووبەڕووبوونەوەی ڤایرۆسی كۆرۆنا ڕابگەیەنن.

مەلا یاسین سەرۆكی یەكێتی وەبەرهێنەرانی كوردستان لە ڕاگەیەنراوێكدا ڕایدەگەیەنێت:” وەبەرھێنەران و سەرمایەدارە نیشتمان ویستەكان، دوور لەبەرژەوەندییە تایبەتییەكانمان كاتی قۆڵ ھەڵماڵین و تۆماركردنی ھەڵوێستێكی تری جوامێرانەیە، بۆ وڵات و هاونیشتمانییەكانمان”.

سەرۆكی یەكێتی وەبەرهێنەرانی كوردستان ئاماژە بەوەشدەدات:” ھەنگاوەكانی حكومەتی ھەرێم بۆ ڕووبەڕووبوونەوەی ڤایرۆسی كۆرۆنا، جێگای دەستخۆشی و ئومێدی خەڵكی كوردستانە، ئێستا كاتی ڕۆڵ بینین و دەور و تەقەلای ئێمەیە، تا چمكێكی ئەو هەوڵ و زەحمەتە بگرینە دەست كە حكومەت بۆ ڕووبەڕووبوونەوەی ڤایرۆسی كۆرۆنا و سەلامەتی گیانی هاونیشتمانیان ئەنجامی دەدات”.

مەلا یاسین ئەوەشیخستووەتەڕوو:” پێویستە كەمپەینێكی نیشتمانی گەورە و بێوێنە بۆ دەستەبەری هەر پێداویستییەك ئەنجامبدەین تا ھاوكار و ھەماھەنگی كردەوەیی بۆ حوكمەتەكەمان ڕابگەیەنین”.

سەرۆكی یەكێتی وەبەرهێنەرانی كوردستان ڕوونیشیكردووەتەوە:”دەبێت ئەوە بزانین، كە زەرەر و زیانەكانی ئەم ڤایرۆسە هەر تەنھا كاریگەری بۆ سەر تەندروستیمان نییە، بەڵكو مانەوەی دۆخەكە بەم جۆرە، ڕۆژانە دەیان ھەزار دۆلار زیان لەكۆمپانیا و پڕۆژەكانمان دەدات، بە بەردەوام بوونیشی برینی قەیرانەكانی ڕابردوومان قوڵتر دەكاتەوە، جا دوورنییە دەیان كۆمپانیا و سەرمایەداری ترمان مایە پووچ بكات”.

 

دەقی ڕاگەیەنراوەكە:

وەبەرھێنەران و سەرمایەدارە نیشتمان ویستەكان

دوور لەبەرژەوەندیە تایبەتیەكانمان

كاتی قۆڵ ھەڵماڵین و تۆماركردنی ھەڵوێستێكی تری جوامێرانەیە،بۆ وڵات و هاونیشتمانیەكانمان .

ھەنگاوەكانی حوكمەتی ھەرێم بۆ ڕووبەڕووبوونەوەی ڤایرۆسی كۆرۆنا، جێگای دەستخۆشی و ئومێدی خەڵكی كوردستانە، ئێستا كاتی ڕۆڵ بینین و دەور و تەقەلای ئێمەیە، تا چمكێكی ئەو هەوڵ و زەحمەتە بگرینە دەست كە حكومەت بۆ ڕووبەڕووبوونەوەی ڤایرۆسی كۆرۆنا و سەلامەتی گیانی هاونیشتمانیان ئەنجامی دەدات.

پێویستە كەمپەینێكی نیشتمانی گەورە و بێوێنە بۆ دەستەبەری هەر پێداویستییەك ئەنجامبدەین تا ھاوكار و ھەماھەنگی كردەوەیی بۆ حكومەتەكەمان ڕابگەیەنین.

دەبێت ئەوە بزانین، كە زەرەر و زیانەكانی ئەم ڤایرۆسە هەر تەنھا كاریگەری بۆ سەر تەندروستیمان نییە، بەڵكو مانەوەی دۆخەكە بەم جۆرە، ڕۆژانە دەیان ھەزار دۆلار زیان لەكۆمپانیا و پڕۆژەكانمان دەدات، بە بەردەوام بوونیشی برینی قەیرانەكانی ڕابردوومان قوڵتر دەكاتەوە، جا دوورنییە دەیان كۆمپانیا و سەرمایەداری ترمان مایە پووچ بكات.

بۆیە بەشداریكردنمان بە ھەر جۆر و شێوازیك بێت، ئەوپەڕی سەربەرزییە بۆمان بە پێچەوانەشەوە، جگە لەشەرمەزاری ھیچی ترمان بۆ نامێنێتەوە.

مەلا یاسین
١٤-٣-٢٠٢٠